街市檔戶違法吸煙 無視衞生
「我見住佢一路食煙，啲煙灰係咁跌落啲魚度，真係睇見都覺得惡心！」李小姐早前到大埔墟街市地下魚檔購物，期間發現有檔戶竟無視法例在街市內肆意吸煙。李又指已非首次於街市內見到檔戶吸煙，「有時喺熟食中心都見到，話晒都係賣嘢食，喺度食煙真係好唔合衞生！」
食署稱巡查無發現
食環署發言人表示，已於街市當眼處張貼禁煙標誌，承辦商接獲市民舉報後亦會盡快前往現場調查，向有關人士解釋禁煙規定，如發現有人違例吸煙，將會提出檢控。發言人又稱，接獲轉介後曾多次派員巡查，惟未有發現有人違例吸煙，已轉介控煙辦並安排聯合行動，以遏止有關情況。
李小姐不滿食環署僅於接獲舉報才調查，認為當局應多加突發巡查檔戶，又可加強罰則，「如果個檔戶畀人捉咗三次違例食煙就唔續約，咁個檔戶自然唔會食，更加唔會畀職員食。」