海鮮價嚇怕旅客 酒店業殺雞取卵

《伊索寓言》有個故事係咁講嘅,有人養咗隻母雞,日日生蛋,有次突然生咗隻金蛋,主人喜出望外,以為雞肚裏面一定仲有好多金蛋,於是殺咗隻母雞,結果唔使問阿貴,梗係乜都搵唔到喇。呢個殺雞取卵嘅寓言係諷刺眼光短淺、只圖目前利益嘅人,最後乜都得唔到。

唔係講笑,現實當中真係有唔少殺雞取卵嘅例子o架。嗱,香港酒店業就係其中之一喇,自從內地開放個人遊後,香港旅遊業愈來愈興旺,去年訪港旅客超過六千萬人次,其中近八成係內地客,但奇怪嘅係,旅客人數不斷創新高,全年零售數字反而錄得十一年來首次倒退,唔過夜嘅旅客亦愈來愈多,究竟點解呢?答案其實好簡單,內地反腐及香港佔領行動固然打擊旅客消費意欲,而香港酒店「海鮮價」牟取暴利,更加令旅客望而卻步。

呢,平日每晚只需八百至千零蚊嘅四星級酒店,居然喺網上索價逾萬蚊,連質素一般嘅重慶大廈賓館都索價一千七百蚊一晚,係人都怕怕喇。正如酒店業界人士指出,去年十月起訪港旅客訂房情況開始放緩,十一月更較前年同期劇減三成,前景一啲都唔樂觀,加上未來五年將有一萬間新酒店房間落成,而香港又缺乏大型國際盛事,酒店房間隨時過剩都似。

咁又係吖,酒店業殺雞取卵,房價貴到冇朋友,唔少旅客寧願喺深圳同珠海過夜,旅客平均留港時間愈來愈短,酒店業前景又點可能樂觀吖。不可不知,隨着周邊地區尤其係內地城市迅速崛起,香港國際大都會嘅地位正逐漸下降,本來已經好難吸引高端旅客,而酒店業仲以為係皇帝女唔憂嫁,唔係吊高嚟賣,就係實行海鮮價,簡直係倒自己米。正如有人話齋,香港興建咁多酒店無非為咗應付內地客需求啫,依家澳門、深圳、廣州等城市嘅配套仲好過香港,內地客仲點會特登嚟香港過夜吖。

咁都未算吖,隨着中港矛盾愈演愈烈,激進團體一時「驅蝗」,一時「鳩嗚」,一時「佔領」,一時「光復」,搞到七國咁亂,永無寧日,內地客遲早過門而不入嘅咋。唔使講咁多,只要中央叫停個人遊政策,香港即刻死得都似,到時咁多酒店可能只能用來養蚊嘅咋。

即係咁,酒店在商言商,根據市場需求釐定房價,本來係無可厚非嘅,但如果太過急功近利,完全不顧後果,隨時弄巧反拙,得不償失。正如養母雞咁,日日生蛋咪好囉,點解要殺雞取卵,搞到連蛋都冇得食呢?講到尾,做生意最緊要細水長流,咁至可以長做長有吖嘛。