政情:霍啟山突發炮 轟青年交流欠質素

佔領行動圍城多日,一直盛傳有關方面不滿香港青年工作唔到位,浪費十七年光陰。同屬青年嘅渝港青年交流促進會會長霍啟山,喺一個交流活動上罕有開腔批評香港青年交流工作對接失當,組織之間好鬆散,甚至重量唔重質,導致浪費資源。啟山繼承家族搞體育事業衣缽,向來只專注搞小型足球會,甚少議政,但今次一反低調作風,大膽「發炮」,到底有咩事令佢不吐不快?

倡「想創就創旅程」

啟山有感而發話,雖然社會各界積極推動唔同層面嘅兩地青年交流,各式主題、活動應有盡有,但可惜缺乏有效溝通同執行力,出現服務重疊、對接失當,各地出席人數唔平均,甚至只係重量唔重質,導致軸射面有限。點先幫到青年人?啟山提議搞個「想創就創旅程」,為廣州、香港及澳門嘅準大學畢業生及畢業新丁搭建一個互聯網平台,拉埋粵港澳三地嘅政府部門、各大院校、投資基金、龍頭企業及青年組織,提供一條龍式創業服務。其實類似嘅創業資源平台,民間一直有做,今次佢個計劃係咪有用,真係要拭目以待。

第一手消息請下載on.cc東網iPhone/iPad/Android/Windows Phone Apps