政情：創科局難產 罪「莫」大焉
創新及科技局（創科局）喺情人節再次難產，雖然有傳政府計劃將現時由財政司司長曾俊華做主席嘅創新及科技督導委員會，改組成直接向特首報告及權力較大嘅諮詢組織，但有業界人士仍憤憤不平，覺得只係聊勝於無，仲毫不客氣指目前最迫切嘅反而係成立「創科局治喪委員會」，最好由資訊科技界議員莫乃光（Charles）負責，捧住胎死腹中嘅創科局車頭相。
被埋怨無盡力阻拉布
業界人士話，之前已預計創科局多數出師未捷身先死，但一班業界代表都叫做盡過力，「布又剪過、花又送過」，前後三次去立法會外請願。相反，Charles一方面未能阻止泛民主派「拉布」，亦唔覺得佢為成立創科局盡全力。有人甚至質疑，究竟佢嘅取態係政治凌駕業界，抑或業界凌駕政治？又話如果佢唔肯為業界發聲，不如唔好做 辜負一班選民，言談間的火藥味甚濃烈。
雖然政府計劃改組創新及科技督導委員會補鑊，但業界只係覺得聊勝於無，因為委員會冇資源及實權，相信都做唔到實際工作。至於政府打算喺下個財政年度第三次就成立創科局向立法會「闖關」，業界都唔多睇好，相信「拉布」會再次喺議事廳重演。為咗悼念已經死去嘅創科局，佢哋認為業界應該成立一個治喪委員會，仲推舉Charles負責捧住創科局嘅車頭相添！
乃光：好多嘢控制唔到
Charles回應業界指控時話，佢一直有盡力，希望可以成立到創科局，可惜好多嘢都控制唔到，例如政府本身有好多問題、成件事被政治化等。佢又強調，政治同業界係不可分割，冇話邊樣凌駕邊樣，總之政治照樣要面對，亦要支持業界。佢希望政府可以正面啲面對呢件事，下次清楚交代創科局嘅藍圖同策略，相信有議員會支持，當然泛民亦唔好再「拉布」啦。
另外，業界將於今年四月舉辦揉合美酒佳餚元素嘅嘉年華會，推廣資訊科技之餘都吸下客。佢哋透露，場內食品最平都要四十元或以上，部份參展商仲會推出特色食品，例如喺熊肉、鹿肉等，真係不惜工本。