中環出更:廠商會長兼任議員﹖ 大輝:冇話唔得

農曆新年又畀機會一班立法會議員放假,乘機外遊充電,好似廠商會代表林大輝,新年會飛去泰國玩幾日,所以尋日提早同大家拜個早年。大輝講到明如果政改唔通過,下屆都好大機會唔再參選。既然係咁,下屆廠商會代表又有咩人選推介呢?大輝就唔肯講太多,只係話廠商會會長傳統上唔會兼任議員,但傳統可以打破喎。

轉戰直選「未有定案」

其實無論政改通過或否決,大輝都幾肯定唔會留喺工業界功能界別,問題係佢會唔會有決心轉戰直選,或是入埋自由黨。不過,佢尋日就話目前未有定案,如果政改否決咗,繼續做議員都無乜意思喎。講到入黨一事,大輝話,雖然廠商會轉咗會長,但無向佢施壓,但佢估計廠商會都唔想有議員係代表另一個政黨。

至於未來廠商會代表,有傳現任副會長吳永嘉同會長李秀恒都有意角逐。大輝無話睇好邊個,但有人問到佢會長可否兼任議員,佢就好坦白話呢個係不成文傳統,但唔代表唔可以打破。唔知佢咁講係咪想暗示啲咩呢?

卓妮

第一手消息請下載on.cc東網iPhone/iPad/Android/Windows Phone Apps