中環出更:仔女愛搗蛋「皇」婿練就耐性

農曆新年最開心嘅莫過於一家團圓享受天倫樂,唔少人都選擇陪家人過完年先再去外遊。沙田馬場日前舉辦「鄉議局盃」賽事,除咗一班鄉紳捧場外,卓妮仲見到鄉議局主席劉皇發孻女劉玉蓮(Virginia)及其丈夫兼離島區議員余漢坤(Randy)。見佢哋一家相處融洽,Randy就大爆原來子女性格頑皮,明知佢有少少整潔癖,就故意喺佢面前搗亂,結果反而鍛煉咗佢嘅耐性。

Randy笑言,依家啲小朋友進化咗,唔單止識好多新科技,觀言察色亦一流,相比佢哋細個醒目得多。自從家中多咗幾個小朋友後,佢唔止耐性好咗,應酬次數都少咗喎。另一邊廂,仁濟醫院前主席嚴玉麟的大仔嚴子杰(Jacky)家中亦多咗個新成員一齊過農曆年。Jacky話,囡囡啱啱出世兩個月,知道太太每日要照顧個囡囡好辛苦,所以情人節就同太太出街食飯慶祝,係太太生完後首次外出。

嚴子杰抽時間餵女食奶

雖然Jacky經常四出公幹,但都會盡量抽時間分擔湊女任務,好似凌晨四點及早上七點鐘,佢就爬起身餵女兒食奶,仲拍埋片記錄低添!臨近歲晚,佢笑言已買定一大個籃準備帶囡囡出去逗利是,幸福滿瀉。

至於香港工業總會青委副主席劉燊濤(Gary)亦即將有喜,太太預產期係二十五號,撞正初七「人日」。對於買咩奶粉及尿片,佢早已向Jacky取經,目前只欠個名未改好,留待佢爸爸、工總主席劉展灝決定。劉展灝則興奮第一次抱孫,又感慨個仔眨吓眼已經咁大,回想當年喺屋企教個仔踢波,踢爛晒啲玻璃杯被老婆鬧,會心一笑。

卓妮

第一手消息請下載on.cc東網iPhone/iPad/Android/Windows Phone Apps