香港應唔應該興建第三條機場跑道？呢個問題真係考起人，有人支持，有人反對，有人理解，有人質疑，公說公有理，婆說婆有理，都唔知究竟聽邊個好。
即係咁，香港作為國際都會，興建第三條跑道似乎理所當然，新加坡、上海、廣州等周邊城市分別籌備興建第四甚至第五條跑道，連深圳都話要建第三條跑道，香港又點可以落後呢？弊就弊在家陣香港爭拗多多，阻力重重，政客為反對而反對，港府淪為跛腳鴨，連成立創科局都要望天打卦，興建第三條跑道喎，講就易咯！
呢，機場管理局話就話已完成第三條跑道嘅財務及融資安排研究，上月中提交政府考慮，據講工程造價達一千四百幾億港元，比四年前預計多咗一百億元。但不可不知，呢個數字只係初步估計咋，本港公共工程例牌超支，最後埋單計數肯定遠遠唔止，早前有人預料可能超過二千億元，簡直係天文數字。
錢從何來？機管局建議由政府擔保發行債券，以及向每名離境旅客徵收一百五十至二百元嘅「機場建造稅」，以避開立法會喎。冇錯，咁做唔需要向立法會申請撥款，令政客冇得拉布，確實可以避免口舌之爭，慳番唔少時間，問題係，機場原本已向旅客徵收一百二十元離境稅，再加上一百五十至二百元嘅機場建造稅，變成雙重徵稅，咁樣合理咩？市民會同意咩？
退一步講吖，就算錢嘅問題解決咗，環保及安全爭議亦唔係咁易搞得掂。有關注組織分析上月近一萬八千班於深圳升降嘅航班，發現當中逾四千四百班有機會同未來本港「三跑系統」向北飛航道交錯重疊，部分航班交錯點垂直距離不足一千呎，唔符合國際安全標準，擔心隨時有相撞危機。而機管局就話已針對優化珠三角空域管理制訂方案，以國際安全標準為基礎，唔會有撞機危險喎。大家各有各講，誰是誰非，真係審死官。
無論點都好喇，興建第三條跑道涉及巨額資金，絕對唔係講玩，究竟符唔符合經濟效益，有冇實際需要，必須從長計議，深入研究。正如有人話齋，如果特區政府好似港英政府咁強勢，坐言起行，話做就做，咁就有得考慮；否則，一味紙上談兵，蹉跎歲月，唔知幾時至可以開工，咁就嘥氣喇。試諗吓，以港府拖拖拉拉嘅辦事效率，第三條跑道就算成事，亦可能要十幾廿年後至落成啟用，到時周邊城市已後來居上，香港仲需唔需要呢條新跑道，實在令人懷疑，如果得物無所用而淪為大白象，豈不是冤哉枉也！