政情：家產全交子女 唐翔千有保留
好多億萬富豪經常爆出子女爭產，但相信呢啲新聞未必會出現喺前政務司司長唐英年父親唐翔千家族。點解？唐翔千最近出自傳，自爆有一套財產分配安排，佢話唔希望為子女留下太多財產，但所有唐氏家族子孫嘅學費都由家族包起。此外，每名子孫都可以喺全球任何一個地方購買一套實用型住宅，但至於後人食粥食飯就要靠自己喇。
怕「富不及三代」？
唐翔千喺自傳中講到明，連家族企業都唔建議全盤交畀子女，最多讓屋企人喺董事會擔任董事長要職，咁就可以避免有後代不善經商而敗晒啲資產。唐翔千此舉反映佢有「富不及三代」嘅憂慮，所以做定兩手準備。
書中又提到唐英年喺前年特首選舉落敗後，夜晚同爸爸傾電話，唐翔千聽到唐唐把聲有「些許沮喪」，勉勵唐唐：「英年，好好睡一覺，爸爸知道你好辛苦」，並寄語他做不成特首，都要為港人謀福祉。