政情：酒會無份上台 貪曾面懵速閃
「貪曾」前特首曾蔭權爵士捲入貪腐醜聞近三年仍懸而未決，市民眼火爆，而貪曾就繼續逍遙，尋晚厚顏出席喺灣仔會展舉行嘅中聯辦新春酒會。不過，貪曾無得上主禮台，只可以面懵懵喺台下眼望望，其後又喺保鏢掩護下極速離開會場。貪曾先後兩次被問及會否擔心被檢控時，都係封口拒絕回應。
戴上棗紅色煲呔及袋巾嘅貪曾約於晚上六時，在兩名G4人員保護下抵達會展，懶理在場記者之餘，仲一支箭步入會場，並喺進入貴賓室前遇上前政務司司長唐英年，二人見面後相擁及握手，且短暫交談，貪曾其後急步進入貴賓室。
問及檢控 全程封口
隨後全國政協副主席董建華、特首梁振英等一批主禮嘉賓進入會場，並步上主禮台，貪曾亦緊隨其後，但貪曾因只有前特首身份無得上台，只可企在台下眼望望。
當台上致辭及祝酒儀式結束後，貪曾在保鏢護送下以一條直線走向會場出口，只係遇到中大前校長劉遵義伉儷時停留片刻。貪曾於離開會場前，及乘私家車離開會展時，先後兩度被問及會否擔心被檢控，佢都全程封口，未作半句回應。就咁現一現身，唔知佢去嚟做咩呢？請佢去都搞笑啦！