政情：流感勢兇衞士潛水
變種H3N2流感肆虐全港，短短個幾月已經有百幾人中招死亡，有人更伺機危言聳聽瘋傳疫情直逼「沙士」，嚇得人人自危，差在未開始盲搶口罩，難怪食物及衞生局局長高永文成為眾矢之的，被立法會議員鬧爆佢低估疫情。不過，高永文耍絕招苦情伸冤，稱上月十七日至今已見足傳媒十七次，每次都好肉緊咁呼籲市民注意個人衞生。咁講法，佢下屬衞生防護中心總監梁挺雄及衞生署署長陳漢儀去咗邊？
因應流感殺到埋身，立法會尋日特別安排緊急質詢討論疫情，本身係醫生嘅郭家麒指，公共衞生出現咁大威脅，高永文、陳漢儀、梁挺雄及醫院管理局行政總裁梁栢賢四大巨頭責無旁貸。不過，除咗高永文，其餘幾個主理公共衞生嘅高官都長期隱形，高永文難免被人感覺孤身作戰，更令人懷念梁挺雄嘅上手、中心前總監曾浩輝想當年有問必答嘅年代。據知梁挺雄經高永文溫馨提示下，先即日撲出開記招交代疫情。
涂謹申議會內問「症」
隱形官員被逐個抽秤，議員亦乘機向高永文申訴兼要求斷症，涂謹申話佢個三歲仔早前發高燒，漏夜入公立醫院睇急症，點知經分流後要排成五個半鐘先有醫生睇，惟有轉睇私院云云。阿涂似乎唔知民間疾苦，發燒感冒凌晨入公院閒閒哋都等到天光啦，難怪高永文撐公院急症室嘅前線分流指引合適喇。
大舊帶病被寸
前日已經聲都沙晒嘅陳偉業（大舊）尋日繼續戴口罩上陣，但同場嘅譚耀宗（譚Sir）隨即申報自己係六十五歲以上嘅高危人士，向高永文告狀稱大舊前日出席財務委員會特別會議已經講講吓嘢除口罩，問高永文係咪應該呼籲病人離開會議廳。高永文似乎冇咁好氣娛賓，只話係咪返工應該睇咗醫生先囉！遇着下屬唔生性，去到立法會又要應酬班議員，仲要睇實變種流感擴散到咩程度，呢份工認真難撈。