中環出更：清潔工變傑青 寄語「肯搏肯捱」
匯聚傑出菁英嘅傑出青年協會日前換屆，富豪酒店集團副主席羅寶文將傑青主席棒交予外號「清潔大王」嘅甄韋喬（Mickey）。從「倒垃圾」出身發展清潔事業，再走上傑青之路，在於人棄我取。Mickey慨嘆時下青年人只獨沽一味想做律師、醫生、會計師、工程師，看不起「低下工種」，佢認為呢條路機會仲多，只要肯搏肯捱，上位快人一步。
傑青新一屆執委會交接儀式上，除交棒嘅羅寶文外，多位前主席如葉恩明醫生、陳念慈、龐愛蘭等齊撐場。不同年代嘅傑青嚟齊晒，相當熱鬧。
接棒主席 大計多多
今屆主席Mickey出身傳奇，香港大學校務委員會主席梁智鴻（金刀梁）都來講聲恭喜，順便開腔分享喺動盪時代下，如何展現領導才能。金刀梁縱橫政壇、醫界多年，夠晒資格講呢個題目。
金刀梁直言，部分青年人太自我，往往以「我先係最重要」先行，忽略社會問題。佢又提醒大家，領袖唔易做，要做好「極之透明」、「毫無遮掩」準備，仲要抵得諗，好似沙士肆虐時，佢身為醫管局主席，既要帶隊抗疫，仲要處理局內日常工作。睇番時下青年人，真係好少咁捱得，難怪金刀梁有感而發。
Mickey都話好關心青年人向上流動，上任後將舉辦多場論壇，邀請城中名人及傑青分享成功之路，又打算搞「師友計劃」，讓傑青們擔任中學生嘅良師，分享創業、營商及管理心得，啟發青年人嘅新思維。
卓妮