政情：葉澍堃囝囝學燒乳豬

馬會大董葉澍堃有個為食公子葉瀚華（Ian），受爸爸感染，對美食好着迷，有高薪大律師唔做，近年走去搞飲食，仲走入廚房對住火爐學燒乳豬添！Ian喺社交網站上載咗一張相，見佢一身廚師裝束，戴上勞工手襪，聚精會神學燒乳豬，鬼咁認真，但味道係點就唔知喇。Ian透露，有朋友幫佢改咗個花名叫「大鼠」，話佢天生味蕾敏銳，食物經佢試味，就可講出用咗咩主要材料。佢又自爆有次大宴親朋時覺得煮好嘅醬汁唔多對辦，打算再煮過，點知激到等吃嘅朋友紮紮跳，教佢凡事係冇完美嘅，掌握時間先至係最重要。今次佢學燒乳豬，唔知又要「犧牲」幾多隻乳豬呢？