政情：落賀年廣告 鄉局救亞視？
新界鄉議局自搬入沙田石門新大樓後長期財困，去年底先計劃劏開大樓地下停車場出租「撲水」，但如意算盤未打得響，但鄉紳最近又「豪花」約二萬八千元喺亞洲電視落廣告，向全港市民及海外鄉僑拜年。不過，有鄉紳話，亞視近年收視有目共睹，鄉議局落廣告志在幫輕吓亞視出糧畀員工，好難期望收宣傳之效，更莫講話海外鄉紳都睇到嘞。
鄉議局上周二開會，通過執委廖書蘭建議喺亞視落賀年廣告，係鄉議局歷來首次。據知歷時五秒嘅羊年恭喜發財廣告套餐，年三十晚至年初七播足五十次都只係二萬八千元，認真抵玩，部分更安排喺黃金新聞時段播出添。其實區區二萬八千元又點夠出糧呢？如果鄉議局真係有心撐亞視，或者考慮入股亞視，開拍特輯之餘，搵齊二十七鄉鄉頭每日輪流開咪分享鄉情都好。
李居明或幫ATV做風水節目
講到救亞視，堪輿學家李居明尋日就現身亞視大埔總台，商討幫亞視做風水節目。問佢係咪出手幫助亞視？佢就話：「你知啦，好多嘢，睇下啦，盡力，（拍攝風水節目？）未知，未決定，再見！」雖然李師傅好口密，但據知佢係亞視執行董事葉家寶大學同學，故主動聯絡老朋友給予幫助，順道為亞視睇睇風水，給些建議指點一二。據聞李師傅在亞視附近種了幾棵羅漢松，似為亞視催運。