中環出更：勁歌喜舞賀東華144周年
東華三院日前舉行慈善晚宴，今年大玩主題「在一起一百四十四年了」，新舊東華人聚首一堂，包括東華三院歷屆主席會主席孫秉樞、前主席王忠桐、陳聖澤等，數百位政商界名人撐足全晚，場面墟冚。近期歐元大跌，港人紛紛去花都購物，但歐洲受恐怖襲擊肆虐，本來買咗機票飛巴黎公幹嘅東華三院副主席陳祖恒同太太Esther，都因為擔心殃及池魚，臨飛前一天決定取消行程。
為籌備法國餐廳開幕，懷孕七個多月嘅Esther博到盡，腹大便便照飛巴黎採購食材及餐具，佢笑言本來打算出發去當地公幹，無奈恐襲過後氣氛緊張。佢聽聞唔少名店有荷槍實彈嘅士兵把守，殺氣騰騰，問完丈夫意見，都係博唔過，最後決定翹實丈夫出席當晚喺尖沙咀洲際酒店舉行嘅東華三院慈善晚宴，遲啲再飛。
熱舞「快閃」 融化冷漠
東華三院主席施榮恆（Ivan）搵來著名舞蹈家王廷琳編咗隻快閃歌舞，叫埋董事局成員一齊跳，載歌載舞跳足兩分鐘，舞伴仲有逾百位東華三院學生、旗下復康中心弱能人士及長者等，眾人由台上快閃到台下，嘉賓都受熱烈氣氛感染，熱烈打拍子回應。Ivan話，希望能以歌舞融化人與人之間的冷漠，唔好咁吝嗇笑聲，笑多啲，開心多啲喎。
董事鬥飲 輸咗捐錢
勁歌熱舞過後，一班董事局成員嫌未夠喉，鬥飲威士忌，輸咗嘅要捐錢，結果就由前總理譚鎮國奪冠，總理廖偉麟就得第二名，各人獲獎名貴威士忌一支，拎返去屋企慢慢歎。
卓妮