新一份施政報告聚焦港人最關注嘅房屋、教育等議題，冇錯，的確係用心良苦，但問題係，藍圖易畫落實難。係人都知，未來一年香港政治環境只會更加惡劣，推行政策只會更加困難重重，施政報告開支票就容易，能唔能夠兌現真係好難講嘞。嗱，「東方報業民意調查」就顯示，大部分受訪市民並唔睇好。
即係咁，喺目前嘅政治現實之下，呢份報告只能算是四平八穩，務實多，進取少，主打民生政策，尤其喺房屋問題上重點落墨。港府承諾多管齊下徹底改變土地長期供應不足問題，措施就唔少嘞，可惜吖，所謂「發展大計」大多係新瓶舊酒，好似發展大嶼山、新界棕地咁，都喺上一份施政報告提過，唯一有新意嘅，睇怕得所謂「居屋三級制」嘞，包括將部分興建中嘅公屋，以比傳統居屋低嘅定價，售予綠表人士。
當局解決房屋問題嘅誠意毋庸置疑，奈何巧婦難為無米之炊，如果改變唔到覓地建屋阻力重重嘅現實，增加供應只係大隻講嘅咋，市民邊有咁天真吖。呢，民意調查結果顯示，對於施政報告提出將部分公屋售予綠表人士，未來兩年出售四千幾個居屋樓花亦較原先目標少，三成五受訪者認為，措施未能紓緩香港房屋短缺；近兩成人認為，當局漠視公屋輪候冊人龍；兩成三話對加速公屋流轉幫助唔大。
施政報告用咗相當篇幅討論扶貧安老助弱，仲提出預留五百億元改善「退休保障」添，似乎好有誠意，查實係諗縮數，因為政府唔想再提「全民」兩個字，但「全民退保」同「退休保障」根本就係兩回事。嗱，港府早排委託學者提交全民退保方案，家陣又話「免審查、全民劃一金額」嘅退保計劃長遠有財政困難，又話社會上好多人反對免審查方案，要繼續諮詢喎。其實一句講晒，即係港府繼續玩拖字訣喇。
對於港府對全民退保無承擔，唔少市民表達不滿。兩成一受訪市民認為預留金額太少，係敷衍市民；三成四人對全民退保議而不決表示失望；兩成人認為方案缺乏方向。
總括嚟講，市民對當局推動同落實施政報告信心唔足，三成八受訪者覺得報告新瓶裝舊酒，無新意，反觀對報告收貨嘅唔到兩成。正如有學者話齋，施政報告雖然內容豐富，其實同舊年施政報告大同小異。更令人擔憂嘅係，反對派佔領行動失敗之後，立法會全面不合作運動一定會愈演愈烈，港府施政勢必更加寸步難行。
話時話，香港政治生態唔改變，講乜都係假。舊年施政承諾依家有唔少仲係紙上談兵，今次施政報告會唔會再次彈票，大家心照嘞！