最近幾個星期日正舉行四年一屆村代表選舉，當中撇除自動當選嘅村代表，有競爭嘅位置都算有睇頭。好似沙田下禾輋非原居民代表，由○三年起一直都係黃裕財嘅囊中物，但佢就連續兩屆被挑戰。黃裕財係邊個？就係社民連副主席黃浩銘嘅爸爸，呢對父子政見咁大差異，一向都係政壇奇葩。下禾輋尋日投票選舉，最終都係由黃裕財以四十四票當選連任，睇嚟黃裕財選情都無受兒子激進嘅作風影響喎。
另一個矚目選區，就係上水古洞北非原居民代表，話說呢個位，同樣由藍少虎連續做咗三屆，但今年就遇到反對新界東北發展嘅古洞北發展關注組主席李肇華挑戰。李肇華今年首度加入戰團挑戰藍少虎，但藍少虎最終都係以二百二十七票，以超過四十票擊敗李肇華，成功連任。