政情：扮靚要緊 周瑋瑩信韓風未退
有大型韓國護膚品牌在港全線結業，但銀行家族後人周瑋瑩（Jacqueline）就人棄我取，正密斟投資韓國高級護膚品牌，佢話喺韓劇熱潮帶領下，相信韓流仍然未退卻。
一年飛首爾幾次購物嘅Jacqueline，去年飛當地跟星級化妝師學化妝，眼見身邊名媛朋友每次豪花數萬港元瘋狂掃入化妝及護膚品，深信韓國護膚品仍然大有市場，年前喺韓國朋友穿針引線下，正洽談引入韓國護膚品牌。雖然有韓國老闆打退堂鼓退出香港市場，但Jacqueline坦言唔擔心，認為只要謹慎定價及揀舖位，生意仍大有可為。
朱陳嘉敏擬搞深圳「韓國城」
咁啱同佢老友鬼鬼嘅觀瀾湖集團副主席朱鼎耀太太朱陳嘉敏都看中韓流商機，打算喺深圳旗下商場開設「韓國城」，大賣韓國衫褲鞋襪、化妝品，仲開埋食肆添。朱太計過條數，發現愈來愈多韓國人去內地打高爾夫球，整番個「韓國城」，應該吸到財喎。