政情：行會成員乏危機意識？

貪曾「末年」 多人避嫌

特首辦資料顯示，行會喺一○及一一年各召開卅七次會議，平均每年討論二百幾個項目，當中分別有十八及十九項議程因成員涉及利益衝突而需要避席，避席總人次分別有廿四及廿六次。不過，喺一二年上半年、即「貪曾」下台前半年，行會成員避席次數多達二百二十二次，以該半年討論一百六十一個項目計算，平均每個項目都有一點三八人避席，較一○及一一年激增十幾倍。

「貪曾」喺任期完結前被揭涉及連串利益衝突醜聞，包括貪小便宜成日攞着數、又同江湖人士過從甚密，確係「貪盡海陸空、歎盡省港澳」，臭名遠播。唔知係咪因為呢個原因，「貪曾」當時主持嘅行會幾乎每個星期都有成員要求避席，唔知佢哋係咪唔想好似「貪曾」咁，被指涉嫌利益衝突，所以索性避席唔參與討論？

爆醜聞潮 才識避席

於一二年七月新政府上場後，避席情況即時大跌到得返卅次，可能同只得一百零八個項目討論或無咁多敏感政策議題有關。不過，新政府班子上場後無耐，先後發生發展局前局長麥齊光呃租津、前行會成員林奮強被指利用行會機密消息偷步賣樓等事件，翌年、一三年七月又爆出發展局局長陳茂波在新界東北發展計劃上涉嫌利益衝突。唔知係咪呢幾件事，一三年嘅避席次數又上升至二百一十八次。

不過，當一切醜聞事件淡化後，一四年嘅避席次數又回落至一百三十九次。究竟係行會成員喺討論項目中不涉及利益衝突吖？抑或無事發生就令大家嘅危機意識降低呢？