中環出更：梁富華鬧泛民「冇好結果」
討論多年嘅男士侍產假議案去年底終於獲通過，泛民主派曾提修訂建議將侍產假由三日增至七日，搞到勞工界議員左右不是人，即係支持修訂可能得罪勞顧會，唔支持又會被指背棄打工仔，結果工聯會（工記）就修正案投棄權票，因而成為眾矢之的。曾經擔任勞工界立法會議員嘅工聯會副會長梁富華接受訪問時，炮轟泛民成日為博表現不惜抬高個價，最終乜都爭取唔到。
接受蔣麗芸訪問 為工記護航
梁富華當年喺議會內經常同泛民針鋒相對，不時語出驚人，估唔到依家仲係咁好火，日前接受議員蔣麗芸（Ann）訪問時，就侍產假為工記護航兼鬧爆泛民。對於泛民建議將侍產假由三日增至七日，梁富華覺得，立法時訂立最低標準，係希望僱傭雙方都享受到權利，「呢個世界一步到位最後都冇乜好結果，反而係要循序漸進」。
梁富華又暗批某啲議員為博表現會天馬行空咁討論，咁就代表「我幫你爭取咗」，就算最終爭取唔到啲乜，都係政府同僱主嘅責任；又或是勞方邊個唔支持，就係出賣工人利益。今次訪問，點睇都似係Ann搭台為工記解畫，唔知工記會點樣報答Ann嘅人情呢？
卓妮