「不漏洞拉」又嚟喇！年輕一代可能唔知，上世紀七、八十年代，越南難民源源不絕而來，香港淪為難民港，後來幾經辛苦至擺脫呢個包袱，估唔到依家噩夢重臨，難民潮湧現，再次勾起港人痛苦回憶。
係咁嘅，近年入境處截獲非中國籍偷渡客不斷增加，淨係今年頭十一個月已有一千七百多人，比舊年全年仲多四成八，其中越南人超過一千人，激增一點四倍，連孟加拉籍偷渡客亦增加一成八，問你怕未！
點解會咁？入境處發現，有蛇頭利用港府今年初為免遣返聲請實施統一審核機制，散布「特赦」等謠言，吸引各地人蛇偷渡來港打黑工，當中大部分經過內地，水路陸路各佔一半。須知今時唔同往日，家陣係互聯網時代，唔同國籍偷渡客有各自群組，一呼百應，謠言傳播得特別快，導致偷渡風氣迅速蔓延，再咁落去，香港想唔再次變成難民港都幾難。
話時話，「蒼蠅不叮無縫的蛋」，如果唔係香港入境政策漏洞百出，變相打開大門，偷渡客又點會有機可乘吖。呢，偷渡客聲稱受到迫害而尋求庇護，來港後幾乎百分百會提出免遣返聲請，有人一抵埗就自動現身，有人被捕時至提出聲請，理由五花八門，例如畀人追債、回國會畀人斬頭等等，務求可以留喺香港，一旦攞到「行街紙」後就周圍打黑工，甚至作姦犯科，無惡不作，搞到香港烏煙瘴氣。
呢，入境處數字顯示，○九年底到上月底，當局共拘捕超過八百七十名持「行街紙」打黑工嘅非法入境或逾期居留非中國籍人士，另有三千幾人因涉及毒品、盜竊及毆打等刑事罪行被捕。好似蘭桂坊咁吖，近年愈來愈多偷渡客聚集，藏污納垢，淪為生人勿近嘅「人間妖域」。
咁都未算吖，偷渡客除咗帶來各種社會及治安問題，仲增加香港嘅經濟負擔添。過去三年港府已花費近十二億元公帑處理有關申請及提供人道援助，預料本年度開支仲會增加至十七億元新高，你話係咪冤枉吖。正如學者話齋，絕大多數偷渡客唔係政治難民，而係「經濟難民」，當局應該加快審批程序及收緊政策，唔可以再來者不拒。
冇錯嘞，當年法庭裁定持行街紙嘅所謂「難民」可以合法打工，變相鼓勵偷渡，搞到問題不斷惡化。最近入境處話就話採取新機制，將「酷刑聲請」、「不人道處遇」及「難民迫害」三合一處理，但之前已經積壓咗大量申請，目前未審理個案接近一萬宗咁多，都唔知仲要搞到幾時。所以話，港府假仁假義，中門大開，真係累己累人！