渡海濠情：腳踏四船 點到你唔服？
日本漢字協會於每年年底，都會邀請公眾投選一個最能代表當年景況的漢字，今年選出的是「稅」字，而嚟自9號會所嘅葉子就話：「我揀個『服』字！」
分手收場
葉子話：「今年好多事情發生，而且全部都唔到你唔寫個服字，所以要我選年度漢字，我一定會選『服』字，就好似拍拖為例，我咁靚女，一腳踏兩船係好平常嘅事，而且我經驗豐富，所以咁多年嚟都從未畀男朋友們撞過，但今年竟接二連三發生，而且次次都斷正，搞到要分手收場，話說今年我生日，我分三日約唔同男友慶祝，而且約咗唔同時間唔同地方，照計撞到嘅機會真係好微，點知同其中一個去夜場玩時，其餘兩個竟不約而同被自己嘅朋友約咗去玩，最後三個男朋友齊齊碰面，我幾驚三個一齊打我呀！好彩我乘機借尿遁，如果唔係都唔知點算！最後三個都話要同我分手，搞到空窗期咗足足三個月，幾經辛苦至識番個男朋友以為會有好發展，點知到佢出事！」
大打出手
咁你又點發現嘅呢？葉子話：「講起都好笑，情況竟然同我嘅一樣，話說佢約埋大班朋友去夜場慶祝生日，而我可能新相識，所以就邀我赴約，但當我哋喺舞池熱舞時，突然有三個女仔走出嚟，原來三個都係佢嘅女朋友，我當時心諗唔會咁黑啩？但黑還黑，千萬唔好打架呀！點知三個女仔原來都認識嘅，只係我唔識佢哋三個，所以一質問起男友時，互相叫對方收聲，三個女友不忿畀人窒住，於是先口角繼而動武，我一發現唔對路，我就即時走埋一邊睇熱鬧，最後男朋友勸唔掂佢哋，於是想拖我走，我叫佢咪搞我，否則追住我嚟打點算？叫佢要走就自己快啲走，果然佢一走，三條女追住佢嚟喊打喊殺，所以綜觀今年嘅感情事，簡直一塌胡塗，唔寫個『服』字都唔得！」
葉子Profile
年齡：20歲
三圍：33-23-34
撰文：小德
攝影：阿俊