泛民今個立法年度「突襲」立法會財務委員會轄下兩個小組，包括工務小組委員會同人事編制小組委員會，其中工務小組復會至今只係通過咗馬鞍山發展計劃撥款。早前建造業工會同商會就罕有攜手成立大聯盟，要求工務小組委員停止拉布，其中大聯盟兩個分包商代表仲趁平安夜向工務小組主席梁家傑（袋巾梁）發出聯署信，要求該小組唔好再拉布，否則搞到行業裁員或結業，唔知袋巾梁點拆解呢？
發出聯署信嘅係香港機電工程商聯會及香港建造業分包商聯會，信中話若果撥款因拉布而令大量工程延誤甚至大減，唔少中小企分包商嘅資金流都會出問題，加上行內一半工友年過五十，拉布會減少年輕人入行意欲咁話。
袋巾梁就將矛頭指向政府，話本來佢都想調動議程將民生項目調前盡早通過，係政府抽起相關議程。佢反而要求聯會向政府施壓，等議會可以早啲通過公務員加薪等等嘅民生議程喎！