政情：白鴿激字得個貧
佔領行動凸顯民主黨（白鴿黨）定位困難嘅問題，佢哋呢頭自命為溫和泛民，嗰頭又愈走愈激，但講到激又唔及人民力量等激進勢力，可以話兩頭唔到岸，變相痛失兩派支持者。聽講佢哋最近開始嘗到苦果，事關唔少老鴿及乳鴿唔生性，玩抗爭玩到官司纏身，估計淨係打官司費用就數以百萬計，呢啲支出全部由黨埋單，但係錢又難搵，睇怕白鴿黨遲早畀自己玩到乾晒塘。
區選經費好襟計
包括何俊仁在內嘅一班老鴿喺佔領行動後玩自首、留守博拉，估計佢哋上庭牽涉嘅律師費隨時過百萬元，即使有義務律師捱義氣都唔幫得幾多。啱啱進身常委嘅中西區區議員許智峯早前亦涉嫌襲擊保安員，聽聞亦狂燒數十萬元訟費。除此之外，明年區議會選舉殺到埋身，據知白鴿黨預計派出約八十人競逐，如果每人向黨中央伸手攞一、兩萬元，區選經費百幾萬元一定走唔甩。
淨係計呢兩條數已經要幾百萬元，咁搞吓活動籌款喇，誰知遇着好大阻滯。聽聞白鴿黨原定十月舉行嘅黨慶兼籌款晚宴因遇着佔領行動而延期，最後決定明年二月底舉行，白鴿黨主席劉慧卿（卿姐）仲揚言要趁機搞大佢，更以籌款六百萬元為目標，比去年多一倍。不過據聞唔少過去願意出面捐錢嘅支持者，因不滿白鴿黨喺佔領行動中嘅角色，拒絕再向白鴿黨科水，令卿姐好頭痛。冇咗大水喉射住，即使晚宴賣枱反應幾好都冇用，籌到嘅錢分分鐘淨係打官司都唔夠。
元旦撲水冇着落
雙重打擊下，白鴿黨惟有開源節流慳啲使，但往年搞開嘅元旦遊行取消咗，冇得借機向市民籌款，至於年宵攤位一向都只係當宣傳，談不上賺錢。因此，除咗籌款晚宴賣畫、賣獎券之外，聽聞白鴿黨上下都正抓爆頭諗計。其實班白鴿如果識諗就應該管教好一班老鴿同乳鴿，人人生性少少，惹少啲官非，咪唔使搞到周身債囉！