三歲定八十，家陣唔少港孩嘅「志願」係住大屋養番狗，印印腳唔使憂。細細個就冇晒童真向錢看，都咪話唔得人驚。不過冇計啦，今時今日上樓難過登天，呢啲只係社會殘酷現實嘅反映啫。
係咁嘅，本報最近喺各區進行問卷調查，了解依家啲小學生有咩志願，結果發現最多人選擇做老師，其次係富豪、老闆同CEO。嗱，咪以為小朋友立志做教師係為咗作育英才，佢哋可能只係貪份工係鐵飯碗，可以帶嚟好生活咋；至於恨做富翁巨賈嗰啲，更加講明係因為「搵錢快」、「可以買樓」，幾歲人仔就學識拜金，真係後生可畏。
港孩對住屋一樣有好高要求o架。有近四成受訪小學生最想入住豪宅同私人樓，識貨嘅更加點名要住半山區別墅、淺水灣豪宅添。唔怪得有心理學家慨嘆，以前小朋友做同類問卷，被問到理想居所，好多都會答「同屋企人住嘅地方」、「有愛嘅家庭」又或者「空氣清新嘅地方」。專家仲話，小朋友之所以金錢掛帥，係因為家長潛移默化，將物質主義灌輸畀仔女，久而久之咪搞到佢哋價值觀扭曲晒囉。
即係咁，專家嘅分析唔係冇道理，不過時代變遷，對貧寒子弟講呢啲「斯是陋室，惟吾德馨」嘅大道理，似乎過時咗啲喎。唔係咩，居住問題係香港人不能承受之重，唔少人死慳死抵，都淨係夠錢租間豆腐膶嘅劏房，擺得床嚟放唔落櫃，一家幾口屈喺咁嘅蝸居，摩擦爭吵好難避免，嗰種辛苦真係不足為外人道。窮孩子從小就明白貧賤家庭百事哀，唔通叫佢哋大個繼續捱窮，專揀籠屋板間房住咩！
所以話啫，小朋友童言無忌，佢哋嘅「宏大志願」，一嘢踢爆現實嘅醜陋。邊個都想賺大錢，住大屋，可惜現實之中工字不出頭，窮人子弟想通過教育向上流動咯喎，發夢都冇咁早，佢哋淨係見到啲權貴呼風喚雨，出入前呼後擁，威風八面，所謂「搵錢依正路」，歌就係咁唱咯，現實係貪曾「歎盡省港澳、貪盡海陸空」，佢間深圳禮賓府成萬平方呎，淨係廁所都大過你間屋；至於嗰啲也許是人嘅貪官咯喎，睇一次演唱會嘅使費，分分鐘多過好多打工仔一年嘅收入。你哋話嘞，小朋友耳濡目染，有乜法子唔想「搵快錢」吖！
一句講晒，下一代價值觀扭曲，是非不分，係社會病態嘅反映，最終要檢討嘅都係成年人。計功夫茶話齋，想撥亂反正，救救孩子，最快最直接就係將貪曾、貪湯法辦，為下一代樹立正確榜樣，否則下次小朋友嘅「第一志願」可能係貪官都似！