立法會議員田二少日前接受電台訪問，提及學生參與佔領行動，以違法及影響他人利益嘅手法，爭取憲法上冇可能達到嘅訴求，反映香港教育制度失敗，更予人感覺佔領學生有姿勢、冇實際、自私兼意氣用事。
真係多得田二少提醒，香港之所以日漸沉淪，政府嘅管治班子無能，相信亦是其中一個要素，自從出了個不務正業，愛黐飲黐食嘅貪曾外，勢估唔到又出現咗個鍾意外訪遊埠多過返工嘅教育局局長，佢上任兩年半以來合共外訪二十一次，足迹遍及歐美及亞洲，狂花公帑三百六十萬元，當中有一半外訪更是入住五星級酒店！
阿哥，你考察咗咁多各國唔同嘅教育體系，回來又真正為香港混亂嘅教育制度做過乜嘢改革啊？老朽但知作為家長嘅，為咗一個幼稚園學額都要爭崩頭，小一學位又嚴重不足，跨境學童大增，你又有乜好橋同大計啊！
其實，教育政策需要嘅係務實，好多嘢上網搜尋一樣可以研究；解決幼稚園、小一學額錯配或不足，係要多留港做分析、落區考察至有成效，即使推廣新學制，亦要多分析本港嘅就業環境、未來青少年有乜好去向，做多啲調查而唔係向貪曾看齊！貪曾就話「貪遍省港澳、歎盡海陸空」，家陣你都唔輸蝕喎，你係「遊遍歐美亞，瞓盡星級床」。嗱！除咗「吳得掂」呢個諢號外，你又添了個「唔克儉」嘅寶號！
田二少炮轟得啱嘞：自佔領行動爆發以來，吳得掂幾乎全程潛水，未有就學生擔當運動主導發聲，除咗個人能力問題外，經常外訪「考察」相信亦係原因之一。當一個社會出現失範嘅時候，學生戇居居係唔係都舉起黃色雨傘出位扮有型，身為教育局局長、大學校長唔出嚟發警示之言，以正風氣，仲一味話尊重其「創意」，呢啲就係失職，老朽予以嚴重譴責及表示遺憾！