因佔領行動而出位嘅學聯，喺佔領後期曾宣布行動升級包圍政總，結果以失敗告終，聽聞當時一班激進派不滿學聯嘅溫和路線，所以喺上個月三十日逼使學聯咁做。學聯秘書長周永康（Alex）尋日接受電視台訪問時話，當日決定包圍政總係想畀期望行動升級嘅人睇到，激進行為未必有用，社會運動亦唔係一味以升級作為主軸。
誰知此言一出，惹起網民極度不滿，批評Alex咁講好唔負責任，等同送班示威者去死。亦有網民話，唔怪得當日包圍政總無乜學聯成員啦，原來學聯一早打定輸數。
Alex事後知道出事，黃昏就急急喺個人社交網站澄清兼道歉，話咁講法係事後吸取到嘅教訓同分析，唔係事前預算計劃，強調學聯無「希望升級失敗」。最後Alex就為個人不擅詞令引起種種誤會而致歉。究竟Alex係口快快講出真心話，定係唔小心講錯嘢，真係得佢至知。