政情：遊日團爆晒 梁敬國留港消費
尋日中午時分，我哋喺金鐘附近遇到商務及經濟發展局副局長梁敬國（Godfrey），聖誕新年假期氣氛濃厚，我哋梗要趁機問佢假期去邊玩。Godfrey話，原本諗住農曆新年期間報番個日本團，全家總動員去北海道玩，皆因佢同家人已經成年冇出埠旅遊。點知問過啲旅行社，間間都已經滿晒。
機票改期貴 星洲都唔去
咁近近哋去新加坡玩一樣咁開心啫，於是Godfrey就打聽吓去新加坡玩嘅詳情。雖然正值旺季價錢貴晒，但間中豪一次就冇所謂喇，不過回程航班竟然係朝早八點，變相冇咗一日，否則就要每人再額外加兩千幾元改遲幾個鐘飛返嚟，即係去玩四日每人合共盛惠近萬元，Godfrey自言聽完眼都凸埋，最後都係決定留港消費冇咁嬲。