政情：公民講場：幫「仁」求情

前政務司司長許仕仁巨貪案尋日到咗求情環節，其身不正嘅前特首「貪曾」曾蔭權爵士都有份寫求情信，讚揚許仕仁喺九八年亞洲金融風暴「打大鱷」有功，希望法官判刑時要考慮許仕仁對香港嘅貢獻喎。照咁講，第日貪遍海陸空嘅貪曾被法律制裁時，都可以咁樣幫自己求情喇！事關當時出任財經事務局局長嘅許仕仁及時任財政司司長嘅貪曾，連埋時任金管局總裁任志剛聯手擊退國際炒家，佢哋當時坐正個位，逗份豐厚人工，只係做應該做嘅事啫，點可以攞嚟邀功呢？睇嚟貪曾咁求情，似乎係想幫自己多過真心幫許仕仁。