政情：西九「缺水」三招救亡

賣建築物冠名權籌款

政府喺○八年向立法會申請二百一十六億元一次過撥款，注資西九管理局發展文化區。不過隨住近年建築成本上升，連帶工程造價飆升唔少，引起外界關注。西九董事局曾經召開會議討論財務安排，希望政府可以繼續注資填氹，但有關當局堅持西九預算不變，仲叫管理局唔好洗腳唔抹腳，要求佢哋推行一系列開源同節流措施。

董事局左度右度後，終於度出三大撲水好橋。首先就係出售建築物冠名權籌錢。不過據聞經過港大李嘉誠醫學院冠名風波一役後，政府擔心如果容許地產商為西九建築物冠名，將會惹來外界質疑。董事局中人於是決定將建築物內嘅各項設施分拆冠名，容許各界捐錢命名入面嘅劇場、藝術廳，計落雖然冇命名成座建築物咁易搵大錢，但總算可以幫補些少。

出租演奏廳 搞品牌展

另外，由於西九文化區落成後會有大量劇場同演奏廳供表演者使用，董事局就諗緊好唔好將劇場同演奏廳等場地租予外國或本地知名藝術組織，容許佢哋以自負盈虧嘅方式自行營運，除咗可以坐收可觀嘅租金外，仲可以慳番管理場地嘅費用。

雖然西九文化區仲未落成，但已有唔少團體睇準西九有片大草地，舉辦美酒佳餚節等活動。有人就建議同國際知名品牌合作，將場地租畀佢哋搞與文化有關嘅展覽及活動，咁既可幫西九宣傳之餘，亦可收租，仲唔會浪費個草地喎！據聞如果以上三招都唔得，董事局就諗住索性打住「缺水」嘅名號，攤大手板籌款。不過政府已經表明反對，睇怕西九行政總裁連納智今鋪許勝不許可敗。