政情：中環出更：議員為「旅」忙 交委會開唔成
聽日係平安夜，唔少議員為咗唔同其他外遊市民撞到應一應，選擇提早兩日搭飛機出發。不過唔少議員走晒去玩，令原定今日開會討論港珠澳大橋超支等議題嘅交通事務委員會，因法定人數不足而要取消，激到委員會主席田北辰（田二少）紮紮跳。
議程堆積 田二少無奈
田二少話，唔少議員喺呢兩日相繼離港，佢都估到開會人數會比平時少一大截，但由於仲有議員講明放假唔會離開香港，所以佢決定照開會。不過直至尋日朝早，佢再叫秘書逐個打電話畀議員，問佢哋今日可唔可以開到會，結果最後得五個人話得閒出席，有兩個就話唔知到唔到喎！但係就算七個人最後都嚟到，都仲差幾個先至夠法定人數，所以田二少就索性叫秘書處喺尋日下午宣布取消開會，將所有議程留番一月開會再傾過。
早前佔領行動及泛民議員發起不合作運動，令到議會運作受阻，依家又因為議員貪玩而開唔成會，到下次開會時已經堆積咗大量議程。田二少就估計，到時要開足四個鐘先可以處理得晒喎。
卓妮