彩福邨頻壞升降機 阻居民出入

「啲升降機成日都壞，好多鄰居都講笑話要提早去等升降機，費事搞到遲到。」居於彩福邨的阿華指邨內有兩部升降機通往彩禧路近淘大商場，而另外六部則經彩盈邨通往港鐵九龍灣站，平日使用頻繁，每當早上繁忙時間，升降機塔更常現長龍，一旦遇上故障，更需輪候「兩、三轉」才能乘搭。

不過，阿華發現升降機近半年經常損壞，居民經常「有得睇冇得搭」，「彩禧路嗰兩部就壞少啲，但去彩盈邨嗰幾部就成日輪住咁壞！」阿華指彩福邨落成僅四年多，升降機並非「老爺機」，質疑機電署保養不足致故障頻仍。

顏汶羽	升降機每次故障期間，即出現候升降機人龍。 （讀者提供圖片）

繁忙時間排長龍

當區區議員顏汶羽直指彩福邨對外交通一直不足，邨民多選擇步行到港鐵站，而升降機便是接駁到彩盈邨的唯一通道，升降機經常故障更會對多個屋邨的居民造成嚴重不便，「除咗彩福邨居民會用之外，彩德邨有幾幢樓嘅居民都會過嚟呢邊搭升降機落港鐵，朝朝都會有好多人用，壞一部就已經塞死晒！」

居民點睇 胡小姐：「啲升降機真係成日都壞，趕返工返學嗰陣真係搞到好麻煩！」

居民點睇 黃小姐：「啲升降機好似個個禮拜都有壞要停用，搞到好多時都要同人逼。」

機電署發言人承認，過去一年，通往彩盈邨與彩禧路的升降機分別有十二次和兩次輕微故障，其中七次因機門夾有雜物、停電等因素所致，而所有故障均於即日修復。發言人又稱，為確保上址升降機安全運作，已於今年九月下旬至十月中旬期間進行定期更換鋼纜工程，以及法例規定的每五年一次負載測試，期間因而需輪流暫停服務三至五天。發言人又承諾將密切監察升降機的保養維修，確保運作穩定和可靠。

促改善交通配套

「講大話！之前試過要訂零件，結果部升降機要停用成個禮拜。」顏汶羽透露，曾多次向政府要求改善區內的交通及行人設施配套卻未獲接受，配套無法升級的同時，政府卻決定於彩福邨加建公屋，「路同車都冇得加，但居住人口就加，呢幾部升降機依家已經成日有事，到時用量再增加都唔知會點！」顏要求機電署加強升降機保養工作，並促政府改善屋邨的交通配套，以減低升降機負荷。

記者：林永發