聖誕未到，佳音先報，東方報業集團旗下《東方日報》及《太陽報》雙雙報捷，讀者人數齊齊上升，遠遠拋離對手。正所謂，雙劍合璧，誰與爭鋒！
事實勝於雄辯，數字冇花冇假。根據Oracle Added Value公司嘅最新調查報告，《東方日報》讀者超過三百九十一萬人，連續三十八年全港銷量冠軍；《太陽報》亦唔弱，讀者超過一百七十四萬人，連續十五年穩坐第三位。兩報合計，讀者超過五百六十五萬人，比舊年增加十八萬七千幾人，今時今日可以取得咁嘅佳績，直頭係報業奇迹喇。
更威水嘅係，如果扣除讀者重疊部分，東方及太陽讀者約佔全港人口比例六成，係名副其實嘅香港人報紙。相反，被稱為爛果報嘅《蘋果日報》就慘不忍睹喇，讀者比舊年少咗接近十六萬人，跌幅達到百分之七。簡而言之，東方及太陽兩報讀者加埋足足比爛果報多三百四十萬人，淨係計東方讀者咋，都比爛果報多一百六十六萬人，你話係咪贏足九條街吖！
不可不知，Oracle Added Value喺行內江湖地位無可匹敵，喺全球十四個國家設有分公司，調查數據絕對可靠，權威性無可置疑。
有人可能會問，東方及太陽讀者人數上升啫，但讀者質素同背景又點吖？嗱，調查顯示，兩報讀者約有一成半在職人士係僱主、行政人員、經理或者專業人士；四成一在職家庭收入超過三萬元，約有四分一讀者擁有大學或以上學歷。仲有一個數字非常有趣，東方讀者入面超過二百二十萬人係家庭主要消費決策人，比爛果報多六成半。一般人可能對呢個數字冇乜感覺，但係眉精眼企嘅廣告客戶就唔同喇，佢哋識得選擇嘅。
道理好簡單，讀者人數愈多，質素愈高，廣告效力就愈大，廣告客戶透過東方及太陽兩報宣傳產品，自然事半功倍喇。功夫茶唔係賣花讚花香，有事實根據o架，今年四至十一月，東方及太陽兩報嘅廣告合計超過二十六萬五千條，而爛果報只得約十萬條咋，簡直係蚊髀同牛髀。
同樣值得一提嘅係，東方報業集團旗艦網站《on.cc東網》亦好受歡迎o架，調查指百分之十六受訪者曾經瀏覽東網，平均瀏覽次數為每星期八次；東網讀者平均年齡為三十八歲，近四成為大學程度或以上。即係話，如果同時喺兩報及東網落廣告，影響力絕對無遠弗屆。
總而言之，《東方日報》及《太陽報》既係香港人嘅報紙，亦係廣告客戶嘅最佳拍檔。功夫茶應承大家，我哋一定再接再厲，做到最好！