雖然立法會仲未通過創新及科技局撥款申請，但自從勞工及福利局副局長蕭偉強加入政府後，三司十二局問責班子基本上已經齊人，所以特首辦邀請四十幾位局長、副局長及政治助理，尋日朝早八點鐘齊集添馬公園影番張大合照。不過，天公不作美，由朝早六點幾鐘就一直落毛毛雨，特首辦就喺朝早七點鐘通知取消活動，另覓日子再影過。
由於問責班子平日工作繁忙，加上不時又要飛去其他地方公幹，根本好少機會會集齊人喺香港。
所以經過多次夾日子後，特首辦日前終於敲定喺尋日一齊影大合照，又提醒各位司局級官員要着得靚啲，話因為到時會影兩輯相，一輯就係正正經經咁企喺度，另一輯就會影得比較隨意，大家可以隨便輕輕鬆鬆哋擺甫士咁話，但係依家各位司局級官員就要暫時收番啲靚衫先嘞。