政情：嫻姐保古井 與民對着幹
港鐵沙中線土瓜灣站喺興建期間發現宋元文物，發展局月初宣布接納古諮會建議，將車站大堂中間嘅宋元古井先拆除再重置，涉及一千萬元額外開支。工聯會立法會議員陳婉嫻（嫻姐）近日以全國政協身份去信要求國務院文化部派人來港睇睇個古井，爭取原址保留。嫻姐先係參與衙前圍村、大磡村等保育工作，依家仲為咗個古井而要成條沙中線停工，莫非佢唔驚被人批評阻住個地球轉？
嫻姐尋日同傳媒茶敍，話近日聯同兩位關注沙中線發現文物嘅教授一齊去信要求國務院文化部派專家來港考察，再以專家身份向港府提供保護文物嘅意見。佢又批評港鐵淨係考慮經濟問題，選擇用最平嘅方式保育文化遺產，加上發展局盲目聽從港鐵意見，不惜破壞具歷史意義嘅古井，話唔係所有嘢都可以用金錢來衡量嘅。
佢又話，雖然佢知道中央未必會因為一個古井而叫港府停止興建沙中線，又話咁做可能會破壞一國兩制，但由於成件事會直接影響港人身份認同，加上政府勸極都唔聽，所以先會出此下策，希望中央同政府正視事件。
不過，對於一眾土瓜灣居民嚟講，一直對興建鐵路望穿秋水，如果沙中線延遲落成，相信對居民有一定影響，況且鐵路有助樓價提升，總希望愈快通車就愈好。想當年嫻姐成功加入立法局都係得到區內居民支持，但係依家佢寧願攬住個沙中線古井，都要同居民對着幹，唔知區內居民又會點諗呢？
爆CY想有限度輸入外勞
另外，嫻姐喺茶敍上自爆特首梁振英（CY）近日同工聯會成員會晤，了解佢哋對輸入外地勞工嘅意見。嫻姐引述CY話時下建築業面臨請人難苦況，想睇吓勞工界會唔會支持政府有限度輸入外勞。嫻姐話，依家已經有一般性輸入外地勞工等措施，加上本地勞工充足，覺得根本就毋須要輸入外勞喎。