中環出更：商賈讚廣西藥材 質量好
談起廣西，除咗桂林山水甲天下之外，仲有好多好嘢可以發掘。香港廣西社團總會旗下香港廣西總商會（商會）日前舉行成立四周年暨十四市商會成立典禮，一班熟悉廣西嘅總會及分會成員聚首一堂。卓妮見總會會長鄧清河及副會長陳宇齡（Abraham）都係經營藥材生意，佢哋大讚廣西出產嘅藥材質量特別好。
鄧清河話，廣西嘅地勢多數都係高低不平，有利於唔同品種嘅植物生長，而且地理位置偏南，南藥特別多。佢又話，香港人生活節奏急促，應酬飲酒多，好傷肝，廣西嘅雞骨草就啱晒香港人飲喇，間中一日煲嚟當水飲，對肝臟相當有益處喎。不過，佢話唔係所有藥材都要堅持喺當地入貨，好似當歸、茯苓呢類「八珍」喺上環買仲方便。
生產靈芝等中草藥健康產品嘅Abraham就話，中藥唔一定要貴價先算係好，好似廣西盛產嘅羅漢果同肉桂，雖然價錢便宜但功效唔錯。佢又話，部分人對廣西嘅印象仍停留於覺得當地落後，但正因為當地發展得少，對自然環境反而保育得好，連植物都生長得靚啲。
李君豪名古屋自駕遊
當晚出席嘅仲有紀惠集團副主席廖偉麟（Jeffrey）、香港廣西青年聯會主席鍾易民及常務副會長兼港交所獨立非執行董事李君豪（Vincent）。講起日圓大跌，Vincent話會同家人一齊去名古屋自駕遊，過番個溫馨聖誕假期。雖然Jeffrey係廣東人，但佢話廣東廣西都係隔籬鄰舍，加上其家族在廣西營辦十間幼稚園，所以同當地好密切。
卓妮