俗語話，廟小妖風大，池淺王八多。香港郵政只不過係一個小小衙門，但就烏煙瘴氣，醜聞多多，唔止「失信」於民，醜聞百出，內部更加係千瘡百孔，靠害員工。
唔係冤枉佢哋o架。位於葵涌麗瑤邨嘅香港郵政特快專遞運作中心，日前突然降下橫禍，兩塊石屎連鋼筋塌下，其中一塊超過半米乘半米，另一塊直徑亦有三十厘米，好彩一名女職員及時走避，淨係手部擦傷，都算係不幸中之大幸咯。唔怪得有郵政員工話好似喺危樓工作咁，日後考慮戴頭盔返工喎。
咁又係，類似驚險場面已經唔係第一次嘅喇，三年前紅磡國際郵件中心亦發生天花剝落事故，員工抹咗一額汗。今次出事後，香港郵政居然關人個關，將個波踢畀業主房屋署就算數，好似自己完全冇責任咁。其實，正如有立法會議員話齋，香港郵政作為僱主，未有為僱員提供安全工作環境，事後仲將責任推畀房署，有嚴重失職之嫌。
話時話，香港郵政管理混亂，亂象叢生，又點止失職咁簡單吖。呢個衙門經營不善，蝕到入肉，淨係一二至一三財政年度就蝕過億元，郵局執吓一間又一間，員工炒完一批又一批，搞到士氣低落，服務唔插水至奇。今次冧石屎鋼筋，你慌唔係因為慳皮而諗縮數，平時懶理維修保養咩。
最離譜嘅係，香港郵政自顧不暇，唔諗辦法改善服務，反而以卑鄙手段滋擾正義傳媒，唔止違法拆開東方報業集團郵件，而且延誤郵遞，簡直匪夷所思。正如學者指出，傳媒機構屬於敏感行業，香港郵政嘅所作所為等同干擾、審查傳媒機構。冇錯嘞，成件事疑點重重，如果話唔係刻意針對正義傳媒，打壓新聞自由，細路仔都唔信喇。嗱，香港郵政唔止違反《郵政署條例》，亦涉及干犯刑事罪行及干犯《個人私隱保障條例》，由於性質嚴重，引起公眾廣泛關注，東方報業繼日前報警處理後，昨日亦已向私隱專員公署投訴，要求徹底調查，追究責任。
講開又講，世上沒有無緣無故嘅恨，東方報業作為正義傳媒重鎮，長期受到政府部門無理打壓同滋擾，早就唔係新聞，最荒謬嘅係，依家連香港郵政亦充當政治打手，真係令人嘆為觀止。唔知下一次又輪到邊個部門出手呢？今時今日，港府對佔領行動束手無策，唯獨打壓傳媒就無所不用其極，你話係咪倒行逆施吖？一句講晒，公道自在人心，對於香港郵政違法滋擾傳媒，當局必須盡快交代，唔好諗住又不了了之吖！