依家煮食用嘅小型家庭電器真係花款多多，麵包機、雪糕機等層出不窮。本身係新界潮人總會會董嘅立法會議員陳恒鑌（Ben），最近就獲潮人總會贈送二十六個電燉鍋同三十部蒸蛋器，總值一萬一千二百元。阿Ben話，呢批電燉鍋同蒸蛋器係其中一位會董喺上個月初捐出，透過佢喺各區嘅辦事處送贈有需要嘅長者。
阿Ben日前向立法會申報上個月十一日收到合共五十六部、每部價值二百元嘅電燉鍋同蒸蛋器。原來潮人總會有位會董開設小型家庭電器廠，總會主席周厚澄就向呢名會董「揼心口」，問可唔可以捐啲電器畀長者，呢位會董最後亦冇托手o架。阿Ben聽見就嗱嗱聲向總會申請，攞咗呢批電燉鍋同蒸蛋器，託地區同事派畀區內有需要嘅長者。
不過，電燉鍋同蒸蛋器呢啲咁新潮嘅家電未必個個長者都識用，唔知阿Ben啲同事有冇教埋長者點用呢？