民主黨（白鴿黨）同公民黨（公文袋）上月被人踢爆靜雞雞就佔領行動及政府對佔領行動嘅處理手法做民意調查，但就懷疑因為民調結果唔啱聽，所以冇公開。事隔約一個月，據悉泛民近日又再就佔領行動做民調，提問內容除咗關於立法會議員辭職搞變相公投外，仲問埋市民對補選嘅投票意向。不過，由於民調結果顯示泛民支持度下跌，所以有關民調同上次一樣都係收埋就算。
話說近日泛民又再就佔領行動進行民調，問卷問題包括佔領人士係咪應該退場、泛民應否發動辭職公投、泛民辭職後補選，以及市民會投畀泛民定建制派等。據聞民調結果顯示，認為佔領人士應退場嘅市民有所增加，而市民對補選嘅投票意向更加有大變動，過往泛民對建制派嘅得票比率接近六四比，但今次就顯示雙方距離拉近到五五波。民調再次顯示泛民支持度下跌，故此泛民又再將民調收埋，而佢哋近日對辭職公投扭扭擰擰，相信亦同民意走向有關。
我哋就問過公文袋同白鴿黨中人，佢哋就唔認有做過新一輪民調。如果唔係兩大泛民政黨做民調，咁又係邊個喺幕後策劃呢？有關民調嘅費用又喺邊度嚟嘅呢？莫非又係肥佬黎科水？