政情：反擊泛民 建制謀倒雙梁
泛民主派喺立法會新年度起發起不合作運動，除極力阻撓同民生無關嘅議案通過外，仲因為建制派「漏招」而搶走財務委員會（財委會）轄下工務及人事編制小組委員會嘅正、副主席職位，企圖阻撓具爭議性嘅撥款申請。建制派事後欲補派人加入兩個小組委員會卻遭泛民反對，但建制派將計劃透過財委會強行通過補派人加入，繼而反擊向兩個小組委員會主席梁家傑（袋巾傑）及梁繼昌（Kenneth）提出不信任動議，等「雙梁」唔可以為所欲為。
工務及人事編制兩個小組委員會主席職位分別落入袋巾傑同Kenneth手上後，有如控制政府開位及撥款申請嘅生殺大權。雖然政府暫時未有極具爭議性嘅開位申請需要人事編制小組委員會審批，但由於工務小組委員會喺上個會期受到泛民「拉布」而堆積大量議程未及審議，要留到今個會期委員會繼續審議，令袋巾傑可以全權控制會議節奏。
由於泛民講明話會「放生」民生議題，袋巾傑上任後企圖打破委員會一向議事慣例，要求運用主席權力調動會議議程，將民生議程調前優先審議。雖然政府同建制派已經表明反對，但袋巾傑喺徵詢立法會法律顧問後確認議事規則容許主席調動議程，仲話初步傾向調動議程，但就要同委員討論後先作最後決定。
勢補人入工務人事委會
見到泛民為所欲為，建制派即時派人補加入兩個小組委員會，希望阻截泛民操控小組委員會。由於委員會內嘅泛民議員傾向反對建制派補派人加入嘅要求，建制派惟有根據議事規則轉為向財委會埋手，要求財委會投票決定是否容許佢哋補派人加入兩個小組委員會。由於建制派喺財委會內人數佔優，幾乎肯定可以收復失地。
為咗「報復」泛民開頭唔肯畀佢哋加入，有建制派議員計劃學泛民慣用嘅絕招，就係向袋巾傑同Kenneth兩人提出不信任動議，如果動議獲得通過，兩人就要辭去主席職位，令兩人唔可以繼續自把自為、為所欲為。