中環出更：高佬賢做老襯 派帖「懶神秘」
今年宜嫁娶，唔少情侶都即刻拉埋天窗，勞工界立法會議員郭偉強已定於明年二月、農曆新年前同拍拖多年嘅女友結婚。點知漁農界議員何俊賢（高佬賢）尋日就搶閘向其他議員派喜帖，宣布今個月就同拍拖三年嘅女友Elaine結婚，一於做老襯告別單身一族。
月尾擺酒 近日先派
高佬賢透露，女友做社工，兩人喺三年前一場義工活動上相識，佢今年初向女友求婚，暑假休會時更加去咗北京萬里長城影婚紗相，認真收得埋。雖然兩人已經訂咗本月三十日喺元朗一間酒樓擺三十幾圍宴請親朋好友，但由於兩人性格低調，高佬賢早兩日先開始派帖，仲有唔少親友未被知會。
高佬賢尋日準備咗一疊喜帖，準備派畀一眾議員，佢話當自己喺內部黨團會議上派帖時，鍾樹根反問佢：「乜你仲未結婚o架咩？」雖然主席譚耀宗都有恭喜佢，但就同時望向仲未結婚嘅陳克勤話：「依家好似得番你一個（未結婚）咋喎！」而高佬賢向立會主席曾鈺成派帖時，就更加被笑「懶神秘」。
卓妮