中環出更：「電鑽大王」膺傑出工業家
喺香港做工業，貴在有熱誠。為咗發掘工業家嘅奮鬥故事，香港工業總會早前舉行年度傑出工業家及青年工業家頒獎禮，工總前主席兼「電鑽大王」鍾志平（Roy）獲頒傑出工業家獎，另有七位青年工業家誕生，包括全球最大手套生產商昌利行董事總經理林曉盈及創隆實業總經理陳偉等人。
頒獎禮晚宴上，政商界及工業界老中青齊聚，浸會大學校長陳新滋、嶺南大學校長鄭國漢及科技大學校長陳繁昌亦有到場。難得幾位校長同場，卓妮趁機問佢哋知唔知仲有幾多自家學生仍罷課參加佔領？鄭國漢話，唔肯返學嘅嶺大學生「兩隻手數得晒」，陳新滋就話浸大仲有約三十位同學未返學。不過，陳繁昌就笑笑口話，科大好少同學罷課喎！
拎獎座四圍走「驚唔見」
當晚阿Roy表現好風騷，時刻拎住獎座周圍走，笑稱驚唔見喎！抱病主持頒獎禮嘅工總主席劉展灝就盛讚阿Roy當年隻身由澳門來港創業，係典型白手興家嘅成功例子，值得工業界借鏡。
新鮮出爐嘅青年工業家陳偉就獲各界好友撐場，包括電鍍業商會會長兼中華廠商聯合會會董吳國安，佢係陳偉嘅提名人，而今次係電鍍業首次有人獲獎，所以佢成晚開心到好似自己獲獎咁。
俊和發展主席彭一庭都有現身，早前俊和高調去信多間大學取消資助獎學金，以示對學者及學生領袖參與佔領行動嘅不滿，事件一度引起熱議。不過，當晚佢笑笑口封嘴，話屋企人已有共識唔再就事件發言喎！
卓妮