元朗：持續違泊 警方執法不足
「戙個牌喺度講明泊車就會抄牌，但事實啲違泊車依然塞咗一條線，證明啲車主根本就冇放個警告喺眼內！」元朗居民孫先生家住牡丹街，指上址違泊問題已持續多時，投訴後亦曾目睹警方執法，情況卻未見改善，「好似趕雀咁，你呢頭趕完就有第二隻飛過嚟，根本就沒完沒了。」
市民促「再睇實啲」
警方發言人證實，去年十月至今年九月共就涉事位置汽車阻塞及違例停泊接獲廿八宗投訴，期間共發出三百零五張定額罰款告票。發言人強調，一直關注區內交通違例問題，將按情況作出檢控。
孫先生要求警方日後多加巡查，嚴加執法以收阻嚇作用，「三百張告票聽落好似好多，但其實計埋平均一日先出得一張，我每次行過都有成三、四架車違泊，即係警方要再睇實啲，啲車主先識驚！」