如果話，錯而能改，善莫大焉，咁港產官僚錯而不改，都算惡莫大焉咯。嗱，食環署轄下公共街市多次被審計署踢爆管理不善，空置率長年偏高，虧損嚴重，只要稍有羞恥之心，都會洗心革面撥亂反正喇，點知食環官僚就係面皮成尺厚，擇惡而固執，搞到街市十室九空，暴殄天物，你話係咪教而不善吖！
民間團體上月抽查全港八個公共街市及熟食市場，發現空置問題非但未有改善，仲不斷惡化添。以荃灣荃景圍街市為例，全數二百四十八個檔位之中，有二百二十個無人租用，空置率高達八成八，簡直慘不忍睹。類似「盛況」亦出現喺葵涌大圓街市熟食市場，空置率高達八成五，巡查當日全場僅得三間熟食店營業，而且視察一個多小時完全「零顧客」。銅鑼灣燈籠洲街市及筲箕灣街市亦係重災區，空置率分別係六成四及五成七。團體力數食環署七宗罪，包括坐視街市空置率持續偏高、任由巨額公帑浪費，以及縱容租戶將舖位當貨倉等等，真係冇鬧錯o架。
事實再次證明，港產官僚死性不改嘅劣根性真係強頑到你唔信。早喺○三年，審計署已經揭發公共街市空置率偏高，要求作出改善，當時食環署知衰認錯，承諾補鑊，可惜意見接受，態度照舊，○八年再被審計署炮轟。點知食環署街市拍烏蠅問題十年如一日，一啲改善都冇，以致虧損日益嚴重，庫房流血不止，單係過去一年就虧損兩億三千萬元，呢啲都係真金白銀嚟o架。今時今日，香港最珍貴嘅係土地資源，食環署身為大地主，冇為庫房作貢獻，反而年年蝕錢，你話係咪敗家吖。港府居然聽之任之，闊佬懶理，咁就難怪施政愈來愈不濟，民怨愈來愈巨大，社會愈來愈激進咯。
講來講去，都係前朝政府種落嘅禍根。正如調查團體話齋，前任食衞局局長周一嶽未有認真處理街市空置問題，對審計署嘅批評更加當係耳邊風，所以咪搞到問題尾大不掉，積重難返囉。「周一鑊」係有關問題嘅「開鑊功臣」，而今屆政府一樣難辭其咎，上場兩年幾唔係短時間，未有撥亂反正不特止，反而弄虛作假，粉飾太平，為咗掩飾轄下街市長期荒廢嘅醜態，早前居然篤數指出租率達九成，簡直不知醜字點寫。
一句講晒，街市空置年復年，食環官僚教不善。港府經常呻缺地建屋，反正街市空置都係養蚊，不如就研究拆卸建屋喇，一來唔使再十室九空篤眼篤鼻，二來可以幫助無殼蝸牛，減少社會怨氣，何樂而不為呢？