政情：「六散人」唔好聽要改名
成立咗幾個月嘅立法會「六散人」近來積極行動，先係尋日約埋去見政務司司長林鄭月娥，下星期又會同特首梁振英及財政司司長曾俊華會面，就明年發表嘅施政報告及財政預算案發表意見。雖然佢哋係以「六散人」呢個名義約見政府官員，但原來大家都覺得「六散人」呢個名麻麻哋，諗住盡快改番個新名喎。
星爺曾提議叫「六君子」
金融界議員吳亮星（星爺）話，雖然上屆由功能界別議員組成嘅聯盟都係稱呼自己做「散人」，但佢覺得「六散人」個名畀人感覺「散散哋」，似乎唔多好聽，於是就建議其他盟友齊齊幫手諗番個新名。佢話六個人有君子氣量，可以考慮叫聯盟做「六君子」喎。
不過，星爺諗咗幾秒，就醒起清朝末年推行百日維新後，慈禧太后下令捕殺一眾主張變法嘅人士，包括時稱「戊戌六君子」嘅譚嗣同、林旭等人。星爺於是覺得「六君子」個名唔多吉利，話要搞番個徵名比賽，邀請各界度橋。召集人廖長江都認為改名一事事關重大，話要盡快商量吓喎。