政情：長毛謀自辭 拉泛民落水

陳家洛縮骨 AV仁扭擰

主戰派提出辭職變相公投主要有兩個方案，首個方案係泛民五區都有議員辭職，如一○年五區辭職變相公投翻版，第二個方案係搵一名俗稱「超級區議員」嘅區議會第二界別議員辭職，呢個方案得到學民思潮支持，而公文袋議員陳家洛亦有叫超級區議員辭職。

早前承諾唔會搶閘辭職嘅長毛，尋日盡最後努力拉泛民落水，可考慮由泛民三名超級區議員辭職，其後再話如果都係無議員肯辭職，會考慮自己一人辭職，發動一區公投。

不過，曾表明願意辭去超級區議員嘅白鴿黨「AV仁」何俊仁接受查詢時扭扭擰擰，自言「講過好多嘢」，但憂慮辭職公投會否投票率低、出現公投議題複雜等問題，似乎努力搵藉口為唔支持辭職公投鋪路。

倘成事 料由黃浩銘出選

據聞泛民飯盒會經過連日討論後，傾向唔支持辭職公投，因此餘下問題，就係長毛會否兌現承諾發動一區公投，但仍要通過社民連內部一關，如果成事好大機會由社民連副主席黃浩銘接棒參選。

不過，只得新界東一區選民投票變相公投，投票結果得出嘅結論可以有幾大代表性呢？似乎冇實質作用。此外，黃浩銘參選亦未必穩勝，因為可能遇到一位競爭對手，有政界中人估計西貢區議員方國珊可能參加補選，事關佢上次只以些微票數入唔到立法會，如有補選加上無建制派包袱，絕對有力一拚。講開方國珊，佢早前被指涉嫌觸犯「藐視立法會」罪，今日於東區裁判法院提堂。