中環出更：議席想交棒 發叔：女婿有興趣
村代表選舉將於明年一月舉行，下周五就開始接受提名。本身係龍鼓灘村村代表嘅鄉議局主席兼立法會議員劉皇發（發叔），就話會繼續參加村代表選舉，繼而選埋鄉事委員會同鄉議局主席，反映七十八歲嘅發叔未肯言退。不過，發叔似乎無意連任立法會鄉議局功能界別議席，仲講到明想交棒畀後生仔。邊個係「後生仔」？佢首次透露女婿、信和置業董事總經理余漢坤有興趣。
「成日坐喺立會好辛苦」
發叔話，成日坐喺立法會開會好辛苦，所以係咪連任要再諗吓先。發叔話兒子劉業強無興趣呢方面嘅工作，同時發叔就打晒開口牌話女婿有興趣做。其實鄉事派內部早已傳出發叔想交棒畀女婿，而余亦一直有迹象鋪路從政，除咗有傳佢想由離島委任區議員轉戰直選外，早前仲加入埋大嶼山發展諮詢委員會，嶄露頭角。
至於發叔點解仲選村代表，佢就話一九五九年開始做龍鼓灘村村代表，做開有感情，加上村內一有糾紛，村民都會搵佢做和事老，啲村民唔想有人為爭做村代表而搞到條村立立亂，所以就想佢繼續坐鎮喎。發叔又話，得閒打吓麻雀，間唔中去吓行山，吸收吓靈氣，人都會精神啲。
卓妮