中環出更：鄭慕智獻唱籌款
前身係舊病理檢驗所嘅香港醫學博物館，日前喺黃竹坑醫學專科學院舉辦籌款晚宴，為設立於百年歷史建築嘅博物館籌募日常開支經費。多位城中名人出席表演支持，其中被喻為唱得之人的教統會主席鄭慕智（Moses），今次都開腔為籌款晚宴獻唱名曲，技驚四座，掌聲不絕，有嘉賓更捐出五萬元希望Moses安歌添！
Moses當晚表演嘅係意大利歌曲《O sole mio（我的太陽）》。唱開高音嘅Moses聲線雄渾厚亮，佢透露表演之前並冇刻意練習。而佢之所以咁好氣，除咗唱開歌外，仲可能係因為近期多咗游水，加上有太太煲嘅靚湯滋潤，把聲自然靚晒，難怪好多台下嘉賓朋友一聽到即馬上起哄鼓掌。
鄭明明與助理被當母女
當晚嘅嘉賓仲有同籌款晚宴籌委會主席王振宇（Benjamin）非常熟落嘅「快勞夾大王」杜振源（Simon）。Simon除咗係小母牛香港籌款委員會主席外，仲係香港醫學博物館學會副贊助人。佢捐咗十二支一九八二年嘅靚酒作慈善拍賣，相當支持。而Benjamin就希望，籌得嘅資金可以助博物館繼續發展教育用途，等更多人了解本港嘅醫療發展。
另外，「美容教主」鄭明明亦有到場，見佢身旁嘅助理葉曉凌（Brooke）同佢有幾分相似，鄭明明就自爆原來好多人誤以為Brooke係佢個女，又話當初請助理時第一個見嘅就係Brooke，一睇就覺得好合眼緣所以決定聘請，其後發現助理工作亦好醒目，笑言想收佢做契女喎！
卓妮