開講有話，福無雙至，禍不單行，家陣佔領鬧劇死唔斷氣，都唔知點收科，偏偏喺呢個風頭火勢時期，禽流感、伊波拉、登革熱等惡疫環伺，難聽啲講句，呢幾味嘢全部威力驚人，是但中一瓣都唔掂呀！
呢，好似變種禽流感H7N9咁吖，舊年經歷過兩波大爆發嘅江蘇，又再確診新病例，留院嘅五十八歲患者曾經幫襯當地違規雞檔，目前情況嚴重。即係咁，內地去年至今共錄得超過四百宗禽流感確診個案，其中江蘇就佔五十幾宗，僅次於浙江同廣東。有專家警告，由於候鳥喺入冬後向南遷徙，大大增加傳入香港嘅風險，當局一定要打醒十二分精神防疫。
唔講防疫猶自可，一講把幾火。家陣全港只有一成四人打咗流感疫苗，根本起唔到社區防疫作用，至於站喺抗疫第一線嘅醫護人員亦唔好得幾多，接種率只有三成咁大把，連食物及衞生局局長高永文都承認，相對有啲國家嘅疫苗覆蓋率達到六至七成，本港嘅情況好唔理想。高局長解釋，醫護人員係擔心有副作用，所以接種率偏低咁話。
咦，咁就奇怪嘞，一方面當局大派定心丸，話冇證據顯示疫苗有嚴重副作用，另一方面就連具備專業知識嘅醫護人員都唔敢接種，咁即係點呀？當局係咪有啲嘢未講清楚呢？最大鑊係，一旦禽流感長驅直入，連前線醫護人員都保唔住，仲點樣保護市民吖。
禽流感固然來勢洶洶，伊波拉病毒更加係殺到埋身。尋日之嘛，一名從內地抵港嘅西非旅客，因為發燒不適急送伊利沙伯醫院，一度惹來伊波拉疑雲，雖然後來證實虛驚一場，但已足以證明世紀絕症同香港只係一步之遙，絕對唔可以掉以輕心。
係人都知，伊波拉至今無藥可醫，各地唯一可以做嘅係檢查同追蹤入境旅客。就講澳門吖，當地早喺今年八月就宣布對西非入境人士進行健康評估，兼且每日透過電話追蹤佢哋嘅健康狀況。廣州檢疫當局更絕，日前宣布為來自伊波拉疫區嘅旅客免費發送手機以便監控追蹤，條件係保證廿一日內唔關機。反觀港產防疫官僚，一味滋油淡定，起初淨係喺口岸派吓單張就當交咗差，後來畀人鬧得多，至話派發健康監察問卷，仲要唔係強制嗰隻，效用有幾大，不問可知。
講到呢度，功夫茶不期然憂心忡忡，今時今日，港府施政幾乎癱瘓，社會亂象叢生，比○三年沙士時期有過之而無不及，當局仲係唔嗲唔吊大唱空城計，一個唔好彩爆發疫症，後果只會比當年更大鑊，死得人更多嘅咋！