政情：湯恩佳斥佔旺擺關帝上枱
佔領行動持續個幾月，旺角示威區擺放「關帝廟」神壇拜關公之餘，更用來作為路障，仲有啲人去嗰度上香「參拜」，蔚為奇觀。早前我哋喺一個活動見到孔教學院院長湯恩佳，唔知佢點睇呢個示威文化，示威者咁做又係咪對關帝不敬呢？
話霸街造成滋擾
啱啱喺馬來西亞返港嘅湯恩佳似乎唔係好認同示威者咁做，佢話，關公係正義勇武嘅象徵，形象正面而且備受尊重，依家啲示威者長期霸佔街道，行為已對社會造成滋擾不便，佢皺晒眉話：「關公都唔係咁樣嘅！」言下之意，好似覺得關帝畀人擺咗上枱咁。佢仲話，參與佔領嘅學生應該讀多啲書，增加個人知識，他日成為社會棟樑之後，再用個人實力同適當方法去改善社會問題，咁先至係最實際喎！