政情：白鴿黨公文袋各執一辭
佔領行動持續至今已經超過五個星期，至今仍然未有退場迹象，學聯同學民思潮（雙學）近日乘機提出辭職公投運動，要求泛民議員辭去立法會議席，再透過補選測試市民對佔領行動嘅支持度。泛民兩大黨民主黨（白鴿黨）同公民黨（公文袋）雖然口話肯搞辭職公投，但實則就驚輸，各懷鬼胎。
自從雙學提出辭職公投計劃後，由雙學、佔中三子、泛民議員及民間團體組成嘅多方平台，幾乎每日都開會商討具體細節。本來無論係超級區議員辭職定五區總辭都無乜分別，不過由於大家都想喺議會保住話事權，兩黨於是不斷放風，猛話由對方辭職好過自己辭職。
白鴿黨有兩名超級區議員，公文袋就在五區都有議席。公文袋黨魁梁家傑話，如果要五個直選議員辭職，將會令泛民喺地區直選失去否決權。白鴿黨單仲偕就話，如果由超級區議員辭職，廿幾萬傳統功能組別選民就無得藉公投表達意見，所以五區總辭較為可取。
想借功能選民過橋
對於白鴿黨用傳統功能組別選民無得投票呢招「耍太極」，有公文袋中人就提出另一條好橋，就係當超級區議員辭職、政府定出補選日期後，泛民可以委託港大民意研究計劃總監鍾庭耀喺同日搞民間公投，等無份投票嘅傳統功能組別選民有得同時表態。梁家傑早前接受查詢時認為，建議不失為一個好辦法，會喺飯盒會提出等大家討論咁話。
長毛偷步辭職煞停
不過，泛民主派尋日再開飯盒會討論辭職公投問題，結果都係得個吉。雖然傾足成個星期都無料到，但據聞泛民喺會上力勸支持辭職公投嘅社民連梁國雄（長毛），唔好搶閘辭職，費事令其他泛民唔知跟唔跟住辭職好。見到其他泛民朋友淨係識噴口水花，長毛都無佢哋咁好氣，惟有承諾唔會喺泛民有決定前偷步辭職喇！